क्षेत्रेशस्थापनविधिपटलः
अथातः संप्रवक्ष्यामि क्षेत्रेशस्य विधिक्रमम् ।
ईश्वरस्यायुतांशेन क्षेत्रपालोद्भवं तथा ॥ ५०-१ ॥
ग्रामादावैशदिग्भागे लोकरक्षार्थकारणम् ।
प्रासादं प्रतिमां तत्र पूर्वोक्तविधिना तथा ॥ ५०-२ ॥
द्वारन्तु पश्चिमे मुख्यं दक्षिणे मध्यमं स्मृतम् ।
कन्यसञ्चेन्द्रदिक् द्वारं प्रतिमालक्षणं ततः ॥ ५०-३ ॥ प्. २१८)
चतुर्भुजं त्रिणेत्रं वा षट्भुजञ्चाष्टहस्तकम् ।
सुदंष्ट्रं भैरवाकारं कृष्णवर्णं दिगंबरम् ॥ ५०-४ ॥
सर्पयज्ञोपवीतञ्च शिरोमालाकरोटिकम् ।
ऊर्ध्वकेशं सुवृत्ताक्षं नागाभरणभूषितम् ॥ ५०-५ ॥
त्रिशूलं दक्षिणेहस्ते वामहस्ते कपालकम् ।
खट्गञ्च दक्षिणेहस्ते वामहस्ते तु खेटकम् ॥ ५०-६ ॥
एवं चतुर्भुजं विद्धि षत्भूजञ्च ततः श्रुणु ।
नागञ्च दक्षिणेपाणौ तोमरं वामहस्तके ॥ ५०-७ ॥
प्रागुक्तायुधसंयुक्तं षट्भूजं त्विति कीर्तितम् ।
शूलं डमरुखट्वांगं दक्षिणे वामहस्तके ॥ ५०-८ ॥
एवमष्टभुजं प्रोक्तं षट्भुजायुधसन्निभम् ।
जलस्थापनवत् कृत्वा रत्नन्यासादि पूर्वकम् ॥ ५०-९ ॥
क्षेत्रपालं स्वमन्त्रेण प्रतिष्ठां सम्यगाचरेत् ।
क्षेत्रपालाधिकं प्रोक्तं शूलस्थापनकं श्रुणु ॥ ५०-१० ॥
इति क्षेत्रेशस्थापनविधिपटलः पञ्चाशत्तमः ॥ ५० ॥
No comments:
Post a Comment